ខេត្តមណ្ឌលគិរី ៖ នៅក្នុងសិក្ខាសាលាផ្សព្វផ្សាយនិងណែនាំស្តីពីការប្រើប្រាស់សៀវភៅកម្រងព័ត៌មានសេវាសាធារណៈរបស់ក្រសួងសង្គមកិច្ច អតីតយុទ្ឋជន និងយុវនីតិសម្បទា នាព្រឹកថ្ងៃទី១៨ ខែមីនា ឆ្នាំ២០២៥ ឯកឧត្តមបណ្ឌិត អុល រ៉ូ រដ្ឋលេខាធិការក្រសួងសង្គមកិច្ច អតីតយុទ្ឋជន និងយុវនីតិសម្បទា បានជម្រុញដល់អាជ្ញាធរពាក់ព័ន្ឋ ជាពិសេសមន្ត្រីដែលទទួលបន្ទុកសង្គមកិច្ចនិងសុខុមាលភាពសង្គម ត្រូវបន្តពង្រឹងប្រព័ន្ឋជំនួយសង្គមឲ្យកាន់តែមានប្រសិទ្ឋភាព សម្រាប់ប្រជាពលរដ្ឋតាមមូលដ្ឋាន ដើម្បីចូលរួមជាមួយរាជរដ្ឋាភិបាលកម្ពុជា និតីកាលទី៧ នៃរដ្ឋសភានេះ ដែលប្រព្រឹត្តទៅនៅសាលប្រជុំមន្ទីរសង្គមកិច្ច អតីតយុទ្ឋជន និងយុវនីតិសម្បទាខេត្តមណ្ឌលគិរី។
ឯកឧត្តមបណ្ឌិត អុល រ៉ូ រដ្ឋលេខាធិការ មានប្រសាសន៍ថា ការងារសង្គមកិច្ចនៅក្នុងប្រទេសកម្ពុជាបានចាប់ផ្តើមតាំងពីឆ្នាំ១៩៤៧ រហូតមកដល់ពេលនេះ អាចហៅបាន ជាវិស័យដែលមានវ័យចំណាស់ក្នុងចំណោមវិស័យធំៗ ហើយប៉ុន្មានទស្សវត្សរ៍កន្លងមក វិស័យសង្គមកិច្ចនៅកម្ពុជា មានការផ្លាស់ប្តូររគួរឱ្យកត់សម្គាល់។ ឯកឧត្តម បន្តថា ក្នុងរយៈពេល ២៥ឆ្នាំចុងក្រោយនេះ ក្រោមម្លប់ដ៏ត្រជាក់នៃសុខសន្តិភាពពេញផ្ទៃប្រទេស ដែលសម្តេចអគ្គមហាសេនាបតីតេជោ ហ៊ុន សែន បាននាំមកជូនប្រទេសជាតិ និងប្រជាជន តាមរយៈនយោបាយ ឈ្នះ ឈ្នះ កម្ពុជាបន្តសម្រេចបាននូវសមិទ្ធផលធំៗជាច្រើន ក្នុងការអភិវឌ្ឍសង្គម សេដ្ឋកិច្ច និងបានផ្លាស់ប្តូរមុខមាត់កម្ពុជា ឱ្យផុសត្រដែតនៅលើឆាកអន្តរជាតិគួរជាទីមោទនៈតាមរយៈការអនុវត្ត ប្រកបដោយ ជោគជ័យនូវ យុទ្ធសាស្ត្រត្រីកោណ និងយុទ្ធសាស្ត្រចតុកោណ ទាំងបួនដំណាក់កាល និងបានបន្តយុទ្ធសាស្ត្របញ្ចកោណដំណាក់កាលទី១ ដើម្បីកំណើន ការងារ សមធម៌ ប្រសិទ្ធភាព និង ចីរភាព កសាងមូលដ្ឋានគ្រឹះឆ្ពោះទៅ សម្រេចចក្ខុវិស័យកម្ពុជា ឆ្នាំ២០៥០។ ឯកឧត្តម បានបញ្ជាក់ថា សមិទ្ធផលទាំងនេះក៏បាន និងកំពុងជំរុញ និងលើកទឹកចិត្ត ដល់រាជរដ្ឋាភិបាល ក្រោមការដឹកនាំប្រកបដោយភាពឈ្លាសវៃ និងប៉ិនប្រសប់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ឲ្យបន្តបង្កើនកិច្ចខិតខំប្រឹងប្រែង និងសម្លឹងឆ្ពោះទៅមុខ ប្រកបដោយក្តីសង្ឃឹម ភាពជឿជាក់ និងឆន្ទៈមោះមុត ក្នុងការសម្រេចបាននូវចក្ខុវិស័យនៃការប្រែក្លាយកម្ពុជា ទៅជាប្រទេសដែលមានចំណូលមធ្យមកម្រិតខ្ពស់ នៅឆ្នាំ២០៣០ និងជាប្រទេសដែលមានចំណូលខ្ពស់នៅឆ្នាំ២០៥០។
លោក ខឹម សុផុន ប្រធានមន្ទីរសង្គមកិច្ច អតីតយុទ្ឋជន និងយុវនីតិសម្បទាខេត្ត បានឲ្យដឹងថា នារយៈពេលកន្លងមកនេះ មន្ទីរបានចូលរួមយ៉ាងសកម្មគ្រប់កិច្ចការងារគាំពារក្នុងសង្គម ជួយដោះស្រាយបញ្ហាប្រឈមរបស់ប្រជាពលរដ្ឋ ដែលរងគ្រោះ និងងាយរងគ្រោះ កុមារកំព្រា ជនមានពិការភាព ស្របតាមយុទ្ឋសាស្ត្រគោលនយោបាយរបស់រាជរដ្ឋាភិបាល ដែលដឹកនាំដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ៕
