ព័ត៌មានអន្តរជាតិ

ហ្ស៊េរុយសាឡិម៖ ក្រុមហាម៉ាសបានដោះលែងចំណាប់ខ្មាំងអ៊ីស្រាអែលចំនួន ២០នាក់ចុងក្រោយដែលនៅរស់រានមានជីវិតកាលពីថ្ងៃចន្ទ ក្រោមកិច្ចព្រមព្រៀងឈប់បាញ់ដែលសម្របសម្រួលដោយសហរដ្ឋអាមេរិក ដែលជាជំហានដ៏ធំមួយឆ្ពោះទៅរកការបញ្ចប់សង្គ្រាម។ យោធាអ៊ីស្រាអែលបានបញ្ជាក់ថា ខ្លួនបានទទួលចំណាប់ខ្មាំងទាំងអស់ដែលត្រូវបានបញ្ជាក់ថានៅរស់ បន្ទាប់ពីការផ្ទេរដោយកាកបាទក្រហម។ ការដោះលែងនេះបាននាំឱ្យមានការអបអរសាទរ និងស្រែកយំដោយក្តីរំភើបពីប្រជាជនរាប់ពាន់នាក់ដែលកំពុងរង់ចាំនៅទីលាន «Hostage Square» ក្នុងទីក្រុងតែលអាវីវ (Tel Aviv)។ ស្របពេលជាមួយគ្នានេះដែរ អ្នកទោសប៉ាឡេស្ទីនដែលត្រូវបានដោះលែងដោយអ៊ីស្រាអែលជាផ្នែកមួយនៃកិច្ចព្រមព្រៀងនេះ ក៏បានការធ្វើដំណើរទៅដល់តំបន់ហ្កាហ្សា និងតំបន់ West Bank ដែលកាន់កាប់ដោយអ៊ីស្រាអែលវិញផងដែរ៕  

បរទេស៖ ប្រធានាធិបតីអាមេរិក លោក ដូណាល់ ត្រាំ បាននិយាយថាសង្រ្គាមនៅហ្កាហ្សាបានបិទបញ្ចប់ហើយ ហើយតំបន់មជ្ឈិមបូព៌ាកំពុងត្រឡប់ទៅរកភាពប្រក្រតី ខណៈ រូបលោកចេញដំណើរឆ្ពោះទៅកាន់អ៊ីស្រាអែល ជាមួយការទន្ទឹងរង់ចាំក្រុមហាម៉ាសដោះលែងចំណាប់ខ្មាំងអ៊ីស្រាអែល និងចូលរួមកិច្ចប្រជុំកំពូលនៅអេហ្ស៉ីបដើម្បីពិភាក្សាពីការបោះ ជំហានបន្ទាប់ទៅរកសនិ្តភាព។ ថ្លែងទៅកាន់ក្រុមអ្នកសារព័ត៌មាននៅលើយន្ដហោះ Air Force One អំឡុងត្រៀមចាកចេញពីទីក្រុងវ៉ាស៊ីនតោន ឆ្ពោះទៅកាន់អ៊ីស្រាអែលកាលពីថ្ងៃអាទិត្យ ទី១២ ខែតុលា លោក ត្រាំ បានប្រកាសថា «សង្រ្គាមបានបិទបញ្ចប់ហើយ»។ នៅពេលត្រូវបានសាកសួរពីអនាគតសម្រាប់តំបន់មជ្ឈិមបូព៌ា លោក ត្រាំ បានឆ្លើយថា «ខ្ញុំគិតថាវាកំពុងត្រឡប់ទៅ រកភាពប្រក្រតី»។ សូមជម្រាបថា បទឈប់បាញ់មួយរវាងអ៊ីស្រាអែល និងហាម៉ាស បានចូលជាធរមាន ហើយក្រុមហាម៉ាសត្រូវបានរំពឹងថានឹងដោះលែងចំណាប់ខ្មាំងអ៉ីស្រាអែលនៅមានជីវិតទាំង ២០នាក់ នៅព្រឹកថ្ងៃចន្ទ ទី១៣ ខែតុលានេះ។ ប្រជាជនប៉ាឡេស្ទីនវិញបានធ្វើដំណើរត្រឡប់ទៅផ្ទះសម្បែងរបស់ពួកគេវិញ ទាំងនៅភាគខាងត្បូង និងភាគខាងជើងនៃតំបន់ហ្កាហ្សា រួមទាំងទីក្រុងហ្កាហ្សាផងដែរ៕  

បរទេស៖ អ្នកនាំពាក្យរដ្ឋាភិបាលតាលីបង់នៃប្រទេសអាហ្វហ្កានីស្ថាន នៅថ្ងៃអាទិត្យ ទី១២ ខែតុលា បានអះអាងថាកងកម្លាំងអាហ្វហ្កានីស្ថានបានសម្លាប់ទាហានប៉ាគីស្ថាន ៥៨នាក់ និងចាប់ខ្លួនបាន ២៥នាក់ ក្នុងការផ្ទុះអាវុធនឹងគ្នា នៅឯតំបន់ព្រំដែននៃប្រទេសទាំង២។ លោក Zabihullah Mujahid ជាអ្នកនាំពាក្យរដ្ឋាភិបាលតាលីបង់ បានលើកឡើងនៅក្នុងសន្និសីទសារព័ត៌មានថាស្ថានការណ៍នៅតាមបណ្ដោយព្រំដែន និងខ្សែបន្ទាត់ព្រំដែនជាក់ស្ដែងរបស់អាហ្វហ្កានីស្ថាន កំពុងស្ថិតក្រោមការគ្រប់គ្រងទាំងស្រុង ហើយសកម្មភាពខុសច្បាប់ត្រូវបានទប់ស្កាត់មួយផ្នែកធំ។ អ្នកនាំពាក្យរូបនេះបន្ថែមថាកងកម្លាំងតាលីបង់ ៩នាក់ ក៏បានស្លាប់បាត់បង់ជីវិតផងដែរ។ តែខាងប៉ាគីស្ថាន មិនទាន់ធ្វើអត្ថាធិប្បាយអ្វីឆ្លើយតបទៅនឹងការអះអាងរបស់អាហ្វហ្កានីស្ថាននៅឡើយទេ។ សូមជម្រាបថា ប៉ាគីស្ថាន នៅថ្ងៃអាទិត្យនេះដែរ បានបិទព្រំដែនជាមួយអាហ្វហ្កានីស្ថាន បន្ទាប់ពីកងកម្លាំងនៃប្រទេសទាំង២ផ្ទុះអាវុធនឹងគ្នា។ ប៉ាគីស្ថានបាន​ឱ្យដឹងថាខ្លួនបានបាញ់តបត និងបាញ់កាំភ្លើងធំដោយកម្ទេចប៉ុស្តិ៍យាម ព្រំដែនជាច្រើនកន្លែងរបស់អាហ្វហ្កានីស្ថាន។ កងកម្លាំងអាហ្វហ្កានីស្ថានបានបើកការបាញ់ប្រហារលើប៉ុស្តិ៍យាមព្រំដែនរបស់ប៉ាគីស្ថាន កាលពីថ្ងៃសៅរ៍ម្សិលមិញ នៅក្នុងអ្វីដែលក្រសួងការពារជាតិអាហ្វហ្កានីស្ថាន និយាយថា ជាការសងសឹកទៅនឹងការវាយប្រហារតាមផ្លូវអាកាសរបស់ប៉ាគីស្ថានលើទីក្រុងកាប៊ុល កាលពីព្រហស្បតិ៍កន្លងទៅនេះ។ ទីក្រុងអ៊ីស្លាម៉ាបាដ មិនបានទទួលខុសត្រូវលើការវាយប្រហារនេះទេ តែបានចោទប្រកាន់រដ្ឋបាលតាលីបង់ថាកំពុងផ្ដល់ទីជម្រកដល់ក្រុមសកម្មប្រយុទ្ធតាលីបង់ប៉ាគីស្ថានដែលវាយប្រហារលើប៉ាគីស្ថាន ក្រោមការទំនុកបម្រុង ពីឥណ្ឌា។ ឥណ្ឌាវិញបានច្រានចោលការចោទប្រកាន់ បែបនេះ រីឯអាហ្វហ្កានីស្ថានអះអាងថាមិនបានអនុញ្ញាតឱ្យទឹកដីរបស់ខ្លួនត្រូវបានប្រើសម្រាប់ការវាយប្រហារលើប្រទេសដទៃនោះទេ។ ការប្រយុទ្ធគ្នាភាគច្រើនបានបញ្ចប់ ទៅវិញ នៅព្រឹកថ្ងៃអាទិត្យនេះ តែក្នុងតំបន់ Kurram របស់ប៉ាគីស្ថានគេនៅឮសូរសំឡេងគ្រាប់កាំភ្លើង។ តាមក្រុមមន្ត្រីប៉ាគីស្ថាន ព្រំដែនសំខាន់ចំនួន២ ជាប់ជាមួយអាហ្វហ្កានីស្ថាន គឺ Torkham និង Chaman ត្រូវបានបិទនៅថ្ងៃអាទិត្យនេះ រីឯច្រកព្រំដែនយ៉ាងហោច៣ផ្សេងទៀត Kharlachi, Angoor Adda និង Ghulam Khan ក៏ត្រូវបានបិទផងដែរ៕

វ៉ាស៊ីនតោន៖ ប្រធានាធិបតីអាមេរិក លោក ដូណាល់ ត្រាំ នឹងចូលរួមកិច្ចប្រជុំកំពូលមេដឹកនាំអាស៊ាននៅប្រទេសម៉ាឡេស៊ីនៅចុងខែនេះ លុះត្រាតែរដ្ឋាភិបាលម៉ាឡេស៊ីយល់ព្រមអនុញ្ញាតឱ្យលោកធ្វើជាអធិបតីក្នុងពិធីចុះហត្ថលេខាជាផ្លូវការលើកិច្ចព្រមព្រៀងសន្តិភាពរវាងកម្ពុជា និងថៃ នៅក្រៅកិច្ចប្រជុំកំពូល។ ការទាមទាររបស់លោក ត្រាំ ធ្វើឱ្យម៉ាឡេស៊ីស្ថិតក្នុងស្ថានភាពដ៏លំបាកមួយ។ នាយករដ្ឋមន្ត្រីម៉ាឡេស៊ី លោក អាន់វ៉ា អ៉ីប្រាហ៊ីម ត្រូវការចៀសវាងការធ្វើឱ្យលោក ត្រាំ ខកចិត្ត ខណៈមេដឹកនាំម៉ាឡេស៊ីកំពុងស្វែងរកកិច្ចព្រមព្រៀងពាណិជ្ជកម្មមួយ ដែលលោកសង្ឃឹមថា នឹងជួយកាត់បន្ថយពន្ធគយរបស់អាមេរិកបច្ចុប្បន្ន ១៩ភាគរយលើផលិតផលនាំចូលពីម៉ាឡេស៊ី។ ប៉ុន្តែទីក្រុងកូឡាឡាំពួរក៏មិនចង់ធ្វើឱ្យទីក្រុងប៉េកាំងដែលជាដៃគូពាណិជ្ជកម្មធំជាងគេរបស់ប្រទេស និងជាប្រភពដ៏សំខាន់នៃការវិនិយោគពីបរទេស អាក់អន់ចិត្តដែរ។ ពិធីនេះនឹងផ្តល់ឱ្យលោក ត្រាំ នូវឱកាសដ៏ល្អឥតខ្ចោះដើម្បីបង្ហាញខ្លួនជាអ្នកបង្កើតសន្តិភាព នៅលើឆាកអន្តរជាតិ បន្ទាប់ពីលោកបានដើរតួនាទីយ៉ាងសំខាន់ក្នុងការបញ្ចប់ជម្លោះព្រំដែនរយៈពេលប្រាំថ្ងៃរវាងប្រទេសទាំងពីរក្នុងខែកក្កដា។ សេតវិមានក៏បានស្នើសុំជាពិសេសឱ្យអ្នករៀបចំកិច្ចប្រជុំកំពូលដកមន្ត្រីចិនចេញពីពិធីនេះផងដែរ ដើម្បីធានាថា ការយកចិត្តទុកដាក់មានតែលើលោក ត្រាំ តែម្នាក់ឯង ព្រមទាំងកាត់បន្ថយតួនាទីរបស់ទីក្រុងប៉េកាំងក្នុងការសម្របសម្រួលរវាងទីក្រុងបាងកក និងភ្នំពេញ៕  

មូស្គូ៖ ប្រធានាធិបតីរុស្ស៉ី លោក វ៉្លាឌីមៀ ពូទីន បាននិយាយថា ប្រសិនបើសហរដ្ឋអាមេរិក ហ៊ានតែផ្គត់ផ្គង់មីស៊ីលចម្ងាយឆ្ងាយ Tomahawk តាមការចង់បានរបស់អ៊ុយក្រែន ដើម្បីយកមកវាយប្រហារចូលជ្រៅក្នុងទឹកដីរុស្ស៉ី នោះវានឹងនាំទៅរកការបំផ្លិចបំផ្លាញ​នៃទំនាក់ទំនងរបស់ទីក្រុងមូស្គូ ជាមួយទីក្រុងវ៉ាស៊ីនតោនមិនខានឡើយ។ ថ្លែងក្នុងវីដេអូឃ្លីបមួយចេញផ្សាយនាថ្ងៃអាទិត្យនេះ ដោយភ្នាក់ងារទូរទស្សន៍រដ្ឋរុស្ស៉ី លោក ពូទីន បាននិយាយយ៉ាងដូច្នេះថា «ការផ្តល់មីស៊ីល Tomahawk នឹងនាំទៅរកការបំផ្លិចបំផ្លាញ នៃទំនាក់ទំនងរបស់ពួកយើង (រុស្ស៉ី-អាមេរិក)»។ កាលពីថ្ងៃព្រហស្បតិ៍សប្តាហ៍នេះ លោកប្រធានាធិបតីរុស្ស៉ី ក៏បានលើកឡើងដែរថា វាមិនអាចទៅរួចនោះទេ ក្នុងការប្រើប្រាស់​មីស៊ីល Tomahawk ដោយគ្មានការចូលរួមពាក់ព័ន្ធផ្ទាល់ពីយោធាអាមេរិក ដូច្នេះហើយការផ្គត់ផ្គង់មីស៊ីលនេះឱ្យទៅអ៊ុយក្រែន នឹងបង្កើនភាពតានតឹងដំណាក់កាលថ្មីមួយទៀត។ រយៈពេលតិចជាង២ខែ ក្រោយជំនួបកំពូលរវាងប្រធានាធិបតីអាមេរិក លោក ដូណាល់ ត្រាំ និងលោក ពូទីន នៅរដ្ឋ Alaska លទ្ធភាពនៃការសម្រេចបានសន្តិភាពនៅអ៊ុយក្រែន គឺកាន់តែស្ថិតឆ្ងាយខ្លាំងថែមទៀត ដោយលោក ត្រាំ បានបង្ហាញការខកបំណង​​ជាមួយលោក ពូទីន ដែលមិនព្រមទទួលយកសន្តិភាព ហើយបានហៅរុស្ស៉ីថា ជាខ្លាក្រដាស ខណៈកាលពីសប្តាហ៍មុន លោក ពូទីន បាននិយាយបកទៅវិញថា អង្គការ NATO ទៅវិញទេ […]

វ៉ាស៊ីនតោន៖ ប្រធានាធិបតីអាមេរិក លោក ដូណាល់ ត្រាំ កាលពីថ្ងៃចន្ទ ទី២៩ ខែកញ្ញា ទទួលបាននូវការគាំទ្រពីនាយករដ្ឋមន្ត្រីអ៊ីស្រាអែល លោក Benjamin Netanyahu លើផែនការ សន្តិភាពរបស់សហរដ្ឋអាមេរិក ដើម្បីបិទបញ្ចប់សង្រ្គាមនៅហ្កាហ្សា​ដែលអូសបន្លាយពេលជិត ២ឆ្នាំមកនេះ ប៉ុន្តែមិនទាន់ច្បាស់ថាតើក្រុមហាម៉ាសនឹងទទួលយកផែនការសន្តិភាពនេះដែរ ឬក៏យ៉ាងណានោះទេ។ ថ្លែងក្នុងសន្និសីទសារព័ត៌មានរួមគ្នានៅឯសេតវិមាន ក្រោយជួបពិភាក្សាជាមួយលោក Netanyahu លោក ត្រាំ បាននិយាយថាកំពុងខិតកាន់តែកៀកទៅរកកិច្ចព្រមព្រៀងសន្តិភាពសម្រាប់ តំបន់ហ្កាហ្សា។ តែលោកបានព្រមានក្រុមហាម៉ាសថាអ៊ីស្រាអែលនឹងទទួលបានការគាំទ្រយ៉ាងពេញទំហឹងពីសហរដ្ឋអាមេរិក ក្នុងការធ្វើសកម្មភាពដោយសេរី ប្រសិនបើអ៊ីស្រាអែលយល់ថាចាំបាច់ ក្នុងករណីដែលហាម៉ាសច្រានចោលផែនការសន្តិភាពរបស់លោក។ សេតវិមានបានបញ្ចេញផែនការសន្តិភាព ២០ចំណុច ដែលក្នុងនោះរួមមានការអំពាវនាវឱ្យមានបទឈប់បាញ់ជាបន្ទាន់ ការដោះលែងចំណាប់ខ្មាំង ការដកកងទ័ពអ៊ីស្រាអែលចេញពីតំបន់ហ្កាហ្សា ការរំសាយអាវុធរបស់ក្រុមហាម៉ាស និងការបង្កើតរដ្ឋាភិបាលអន្តរកាលមួយក្នុងតំបន់ហ្កាហ្សាដឹកនាំស្ថាប័នអន្តរជាតិមួយ។ យ៉ាងណា គេមិនទាន់ច្បាស់ថាតើរដ្ឋបាលលោក ត្រាំ និងអ៊ីស្រាអែល បានដោះស្រាយការខ្វែងគំនិតគ្នាលើបញ្ហាមួយចំនួនដូចជាលទ្ធភាពនៃការបង្កើតរដ្ឋប៉ាឡេស្ទីនដែលលោក Netanyahu បានជំទាស់ដាច់ខាត និងតួនាទីណាមួយសម្រាប់អាជ្ញាធរប៉ាឡេស្ទីន ដឹកនាំតំបន់ហ្កាហ្សាក្រោយសង្រ្គាមបិទបញ្ចប់ឬក៏យ៉ាងណាឡើយ។ ម្យ៉ាងវិញទៀត គេក៏ត្រូវរងចាំអ៊ុតមើលចម្លើយពីហាម៉ាសផងដែរ។ សូមជម្រាបថា អវត្តមានរបស់ក្រុមហាម៉ាសក្នុងកិច្ចចរចា និងការច្រានចោលម្ដងហើយម្ដងទៀតចំពោះការរំសាយអាវុធ បាន និងកំពុងបង្កើនការសង្ស័យថាតើផែនការសន្តិភាពរបស់លោក ត្រាំ អាចនឹងទទួលបានជោគជ័យ ឬក៏យ៉ាងណា ខណៈមានសេចក្ដីរាយការណ៍ថាអេហ្ស៉ីប […]

បាងកក៖ នាយកដ្ឋានឧតុនិយមថៃ បានឱ្យដឹងថា តំបន់ជាច្រេីននៃខេត្តចំនួន ៤២ អាចនឹងមានភ្លៀងធ្លាក់ខ្លាំង រួមទាំងហានិភ័យនៃទឹកជំនន់ភ្លាមៗ ក៏ដូចជារលកសមុទ្រខ្ពស់ ខណៈទីក្រុងបាងកកក៏រងផលប៉ះពាល់ផងដែរ។ តាមការព្យាករនៅថ្ងៃនេះ ក្នុងរយៈពេល ២៤ម៉ោងបន្ទាប់ ប្រទេសថៃនឹងមានភ្លៀងច្រើន ដោយភ្លៀងធ្លាក់ខ្លាំងនៅផ្នែកខ្លះនៃភាគឦសាន និងភាគខាងកើត ជាពិសេសខេត្ត Bueng Kan, Sakon Nakhon, Nakhon Phanom, Udon Thani, Khon Kaen, Kalasin, Mukdahan, Chanthaburi និងខេត្ត Trat។ នាយកដ្ឋានឧតុនិយមថៃ បានអំពាវនាវឱ្យប្រជាពលរដ្ឋនៅភាគខាងជើងប្រទេស ប្រុងប្រយ័ត្នចំពោះគ្រោះថ្នាក់ពីភ្លៀងធ្លាក់កម្រិតខ្លាំង និងរាយប៉ាយដែលអាចបង្កជាជំនន់ទឹកភ្លៀង ទឹកហូរកាត់ច្រាំងទន្លេ ជាពិសេសតាមតំបន់ជើងភ្នំក្បែរផ្លូវទឹក តំបន់ទំនាប និងតំបន់ងាយរងគ្រោះ។ ទីក្រុងបាងកក និងតំបន់ជុំវិញអាចមានផ្គររន្ទះ ខ្យល់កន្ត្រាក់នៅលើផ្ទៃដី ៦០ភាគរយ និងភ្លៀងធ្លាក់ខ្លាំងតាមទីតាំងមួយចំនួន។ ខ្យល់ បក់ពីទិសនិរតីក្នុងល្បឿន ១០ទៅ៣០គីឡូម៉ែត្រក្នុងមួយម៉ោង។ ស្ថានភាពនេះ កេីតឡេីងដោយសារតែខ្យល់មូសុងមានកម្លាំងខ្លាំង ពាសពេញតំបន់ភាគពាយ័ព្យ ប៉ែកកណ្តាលភាគខាងលើ និងភាគឦសាន រួមជាមួយខ្យល់មូសុងនិរតីដែលមានកម្លាំងបង្គួរគ្របដណ្តប់លើសមុទ្រ Andaman ភាគខាងត្បូង និងឈូងសមុទ្រថៃ។ […]

គូឡាឡាំពួ៖ ម៉ាឡេស៊ី ដែលបច្ចុប្បន្នក្នុងនាមជាប្រធានអាស៊ាន បានគូសបញ្ជាក់ឡើងវិញពីតួនាទីរបស់ខ្លួន និងអាស៊ាននៅក្នុងកិច្ចការសន្តិសុខតំបន់ បន្ទាប់ពីកិច្ចប្រឹងប្រែងប្រកបដោយជោគជ័យនៅក្នុងការជួយសម្របសម្រួលឱ្យមានបទឈប់បាញ់រវាងកម្ពុជា និងថៃ។ នៅក្នុងកិច្ចពិភាក្សាតាមទូរស័ព្ទជាមួយប្រធានាធិបតីអាមេរិក លោក ដូណាល់ ត្រាំ នៅថ្ងៃព្រហស្បតិ៍នេះ នាយករដ្ឋមន្ត្រីម៉ាឡេស៊ី លោក Anwar Ibrahim បានកត់សម្គាល់ពីការប្ដេជ្ញាចិត្តរបស់ម៉ាឡេស៊ី ដើម្បីលើកកម្ពស់សន្តិភាពនៅក្នុងតំបន់អាស៊ីអាគ្នេយ៍។ «ម៉ាឡេស៊ីក្នុងនាមជាប្រធានអាស៊ាន នឹងបន្តដើរតួនាទីប្រកបដោយការទទួលខុសត្រូវ នៅក្នុងការធានាសន្តិភាពតំបន់ ជាពិសេសពាក់ព័ន្ធនឹងបញ្ហាកម្ពុជា និងថៃ»។ នេះជាការគូសបញ្ជាក់របស់លោក Anwar Ibrahim ដោយបន្ថែមទៀតថា លោកប្រធានាធិបតីអាមេរិក ដូណាល់ ត្រាំ បានទទួលស្គាល់កិច្ចប្រឹងប្រែងរបស់ម៉ាឡេស៊ី ជាមួយការចាត់ទុកថាបទឈប់បាញ់ គឺជាសមិទ្ធផលដ៏ធំ ដែលបានឆ្លុះបញ្ចាំងពីភាពគួរឱ្យជឿទុកចិត្តរបស់ម៉ាឡេស៊ី និងភាពធន់របស់អាស៊ាន។ ជាមួយគ្នានេះ លោក Anwar Ibrahim ក៏បានបង្ហាញពីក្ដីរំពឹងផងដែរថា លោក ដូណាល់​ ត្រាំ នឹងមានវត្តមានចូលរួមកិច្ចប្រជុំកំពូលអាស៊ានក្នុងទីក្រុងគូឡាឡាំពួ ប្រទេសម៉ាឡេស៊ី នៅខែតុលាខាងមុខនេះ៕    

បរទេស៖​ ប្រភពព័ត៌មានបានបញ្ជាក់ថា ប្រធានាធិបតីអាមេរិក ដូណាល់ ត្រាំ នឹងចុះហត្ថលេខា​លើការប្រតិបត្តិទាក់ទងនឹង TikTok នៅថ្ងៃព្រហស្បតិ៍នេះ ដែលនឹងប្រកាសថា កិច្ចព្រមព្រៀងលក់ដេីម្បីផ្ទេរកម្មសិទ្ធិអាជីវកម្ម TikTok នៅសហរដ្ឋអាមេរិក ចេញពីក្រុមហ៊ុន ByteDance របស់ចិន បានបំពេញតាមលក្ខខណ្ឌនៃច្បាប់ឆ្នាំ២០២៤។ ច្បាប់ឆ្នាំ២០២៤នេះ កំណត់ឱ្យ TikTok ត្រូវបានហាមឃាត់នៅសហរដ្ឋអាមេរិក​ ឬអាចបន្តដំណេីរការបាន លុះត្រាតែការកាន់កាប់ពីចិនត្រូវបានកាត់ផ្តាច់ទាំងស្រុង។​ បម្រាមប្រតិបត្តិរបស់ត្រាំ ត្រូវបានគេរំពឹងថា នឹងពន្យារពេលកំណត់សម្រាប់ការអនុវត្ត ដើម្បីឱ្យមានពេលវេលាក្នុងការបញ្ចប់កិច្ចព្រមព្រៀង និងធានាថាឆ្លើយតបទៅតាមលក្ខណៈច្បាប់ និងសុវត្ថិភាពជាតិ។​ តាមរចនាសម្ព័ន្ធកិច្ចព្រមព្រៀងថ្មី អាជីវកម្ម TikTok នៅសហរដ្ឋអាមេរិក នឹងស្ថិតក្រោមការគ្រប់គ្រងរបស់អ្នកវិនិយោគអាមេរិក (ដូចជា Oracle និង Silver Lake) ខណៈក្រុមហ៊ុន ByteDance នឹងកាន់ភាគហ៊ុនតិចជាង ២០% និងមានសិទ្ធិបំពេញមុខងារក្នុងក្រុមប្រឹក្សាភិបាលកម្រិតមានកំណត់៕      

បរទេស៖ លោក អាន់វ៉ា អុីប្រាហ៊ីម នាយករដ្ឋមន្រ្តីម៉ាឡេស៊ី និងជាប្រធានប្ដូរវេនអាស៊ាន បានប្រាប់លោក Anutin Charnvavidakul នាយករដ្ឋមន្ត្រីថៃ ឱ្យយកបញ្ហាព្រំដែនជាមួយកម្ពុជា ដាក់តុចរចា តាមរយៈកិច្ចប្រជុំ គណៈកម្មការព្រំដែនរួម (JBC)។ នៅលើបណ្ដាញសង្គមហ្វេសប៊ុក នៅរាត្រីថ្ងៃទី១៨ ខែកញ្ញា ឆ្នាំ២០២៥ លោក អាន់វ៉ា អុីប្រាហ៊ីម បានឱ្យដឹងថា រូបលោកបានជជែក ជាមួយលោក Anutin Charnvavidakul នាយករដ្ឋមន្ត្រីថៃ អំពីការវិវឌ្ឍន៍ចុងក្រោយ នៅតាមព្រំដែនថៃ-កម្ពុជា។ លោកអាន់វ៉ា សង្កត់ធ្ងន់ថា វាមានសារៈសំខាន់ សម្រាប់ភាគីទាំងអស់ ក្នុងការរក្សាសណ្តាប់ធ្នាប់ និងមិនអនុញ្ញាតឱ្យមានភាពខុសគ្នាណាមួយ បង្កើតភាពតានតឹង ដែលមិនចាំបាច់ឡើយ។ លោកអាន់វ៉ា បានស្នើឱ្យបញ្ហាទាំងអស់ ដែលកើតឡើងត្រូវនាំយកទៅកាន់តុចរចា តាមរយៈកិច្ចប្រជុំគណៈកម្មការព្រំដែនរួម (JBC)។ លោកថា ប្រទេសម៉ាឡេស៊ីជឿជាក់ថា ស្មារតីនៃការសន្ទនា ការទូត និងការយោគយល់ គឺជាវិធីល្អបំផុត ដើម្បីធានានូវសន្តិភាព និងស្ថិរភាពក្នុងតំបន់៕