ខេត្តរតនគិរី ៖ ក្នុងឱកាសអញ្ជើញមកបំពេញបេសកកម្មនៅលើទឹកដីខេត្តរតនគិរីដើម្បីឈ្វេងយល់អំពីការរីកចម្រើន និងបញ្ហាប្រឈមនានា របស់រដ្ឋបាលខេត្ត និងមន្ទីរ អង្គភាពជំនាញដែលពាក់ព័ន្ធ នឹងសមត្ថកិច្ចរបស់គណៈកម្មការទី៧ នៃព្រឹទ្ធសភា (គណៈកម្មការ អប់រំ យុវជននិងកីឡា ធម្មការសាសនា វប្បធម៌ វិចិត្រសិល្បៈ និងទេសចរណ៍)ដឹកនាំ ឯកឧត្តម ឈិត សុខុន ប្រធានគណៈកម្មការទី៧ នៅព្រឹកថ្ងៃទី១៣ ខែមីនា ឆ្នាំ២០២៥ បានអញ្ជើញចូលជួបប្រជុំជាមួយ ឯកឧត្តម ណាប់ ប៊ុនហេង ប្រធានក្រុមប្រឹក្សាខេត្ត និង ឯកឧត្តម ញ៉ែម សំអឿន អភិបាលខេត្តរតនគិរី ព្រមទាំងប្រធានមន្ទីរមន្ទីរពាក់ព័ន្ធ នឹងសមត្ថកិច្ចគណៈកម្មទី៧ផងដែរ។
នៅក្នុងជំនួបនេះ ឯកឧត្តម ញ៉ែម សំអឿន បានចាត់ទុកបេសកម្មរបស់គណៈកម្មការទី៧ នៃព្រឹទ្ធសភាមកកាន់ខេត្តរតនគិរី គឺជាការជំរុញលើកទឹកចិត្តដល់មន្ត្រីថ្នាក់ក្រោមជាតិក្នុងការអនុវត្តនូវមុខងារតួនាទី និងភារកិច្ច ស្របតាមគោលការណ៍ច្បាប់ លិខិតបទដ្ឋានគតិយុត្ត និងយុទ្ធសាស្ត្របញ្ចកោណដំណាក់កាលទី១ សំដៅសម្រេចបាននូវកម្មវិធីនយោបាយរបស់រាជរដ្ឋាភិបាល ក្នុងការកសាងមូលដ្ឋានគ្រឹះឆ្ពោះទៅសម្រេចបានចក្ខុវិស័យកម្ពុជា ឆ្នាំ២០៥០ ជាប្រទេសដែលមានចំណូលខ្ពស់។ឯកឧត្តម អភិបាលខេត្តបានជម្រាបជូនគណៈកម្មការទី៧ព្រឹទ្ធសភាថា ចាប់តាំងពីការចេញដំណើររបស់រាជរដ្ឋាភិបាល នីតិកាលទី៧ កន្លងមក ថ្នាក់ដឹកនាំខេត្ត ក្រុង ស្រុក និងមន្ទីរ អង្គភាពជុំវិញខេត្ត ព្រមទាំងអាជ្ញាធរមានសមត្ថកិច្ចគ្រប់លំដាប់ថ្នាក់បានខិតខំប្រឹងប្រែងអនុវត្តតួនាទី ភារកិច្ចយ៉ាងខ្ជាប់ខ្ជួន ស្របតាមច្បាប់ លិខិតបទដ្ឋានគតិយុត្តនានាគោលនយោបាយ និងគោលការណ៍ថ្មីៗរបស់រាជរដ្ឋាភិបាល ក្រោមការដឹកនាំប្រកបដោយគតិបណ្ឌិតរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានដាក់ចេញនូវយុទ្ធសាស្ត្រដើម្បីកំណើនការងារ សមធម៌ ប្រសិទ្ធភាព និងចីរភាព ដែលផ្ដោតសំខាន់លើរបៀបវារៈធានា ប្រសិទ្ធភាពសមិទ្ធកម្ម តាមរយៈការអនុវត្តអភិក្រមឆ្លុះកញ្ចក់ ងូតទឹក ដុសក្អែល ព្យាបាល និងវះកាត់ ជាទឡ្ហីករណ៍ដ៏សំខាន់សម្រាប់មន្ត្រីរាជការគ្រប់លំដាប់ថ្នាក់ ត្រូវអនុវត្តតួនាទីភារកិច្ចរបស់ខ្លួនឱ្យបានល្អប្រសើរ បម្រើប្រជាពលរដ្ឋ ពង្រឹងអភិបាលកិច្ចល្អ ប្រសិទ្ធភាពការងារ និងសមត្ថភាពរបស់ខ្លួន ដើម្បីឆ្លើយតបនឹងការវិវត្តន៍នៃភាពជឿនលឿនរបស់សង្គមជាតិក្នុងយុគសម័យឌីជី ថល។
ឯកឧត្តម ឈិត សុខុន ប្រធានគណៈកម្មការទី៧ នៃព្រឹទ្ធសភា កោតសសើរចំពោះថ្នាក់ដឹកនាំខេត្ត ក៏ដូច ជាមន្ទីរជំនាញ ដែលបានខិតខំបំពេញ តួនាទី ភារកិច្ចបានល្អប្រសើរ និងបានធ្វើឱ្យខេត្តភាគឦសាន ដែលសម្បូរទៅដោយជនជាតិដើមភាគតិច ជាច្រើនរស់នៅយ៉ាងសុខដុម ហើយទទួលបានសិទ្ធ សេរីភាព ស្មើមុខស្មើមាត់ មានជីវភាពល្អប្រសើរ មានសុខសន្តិភាព ស្ថិរភាពសង្គម និងការអភិវឌ្ឍន៍ រីកចម្រើនយ៉ាងឆាប់រហ័ស។ ឯកឧត្តម ឈិត សុខុន បានស្នើអោយថ្នាក់ដឹកនាំខេត្ត មន្ទីរជំនាញបន្តរួមគ្នាខិតខំដោះស្រាយបញ្ហាប្រឈម និងសំណូមពរនានា ដែលនៅសេសសល់ក្នុងក្របខ័ណ្ឌសមត្ថកិច្ចរបស់ខ្លួន ជូនប្រជាពលរដ្ឋឱ្យបានទាន់ពេលវេលា និងកាន់ តែល្អប្រសើរថែមទៀត។ ជាពិសេស ត្រូវបន្តខិតខំឆ្ពោះទៅមុខជានិច្ច ដើម្បីភាពរីកចម្រើន និងបន្តពង្រឹងការអនុវត្ត គោលនយោបាយ “ ភូមិ-ឃុំ-សង្កាត់ មានសុវត្ថិភាព ” អោយបានល្អ បង្ការទប់ស្កាត់ និងបង្ក្រាបបទល្មើសនានា ថែរក្សាសន្តិភាព ស្ថិរភាពនយោ
បាយ សន្តិសុខសណ្តាប់ធ្នាប់សាធារណៈ និងការអភិវឌ្ឍន៍ខេត្ត ឱ្យកាន់តែរីកចម្រើន ស្របតាមកម្មវិធីនយោបាយយុទ្ធសាស្ត្របញ្ចកោណ ដំណាក់កាលទី១ របស់ រាជរដ្ឋាភិបាល នីតិកាលទី៧ ក្នុងការជំរុញកំណើនសេដ្ឋកិច្ច បង្កើតការងារ ធានាសមធម៌ បង្កើនប្រសិទ្ធភាព និងរក្សាចីរភាព ដែលជាយុទ្ធសាស្ត្រក្នុងការអភិវឌ្ឍរបស់រាជរដ្ឋាភិបាលកម្ពុជា៕
