ស្វករខ្មែរ ពន្យល់ដំណើរការចម្រាញ់រ៉ែមាសយ៉ាងស្មុគស្មាញ ឆ្លងកាត់ច្រើនដំណាក់កាល មុនចេញជាផលិតផលសម្រេច
ខេត្តមណ្ឌលគិរី ៖ ថ្ងៃទី១៤ ខែកុម្ភៈ ឆ្នាំ២០២៥ ការចម្រាញ់រ៉ែមាស ត្រូវឆ្លងកាត់ដំណើរការនីតិវិធីយ៉ាងស្មុគស្មាញ តាំងពីដំណាក់កាលកំណត់ទីតាំងរណ្តៅរ៉ែ និងការឈានទៅដកហូតចេញជាផលិតផលសម្រេចចុងក្រោយ។ នេះបើតាមលោក គ្រី ឡាយហុក វិស្វកររ៉ែនៅក្រុមហ៊ុន រ៉ឺនេសង់ មីនើរ៉ល។
លោក គ្រី ឡាយហុក វិស្វកររ៉ែនៅក្រុមហ៊ុន រ៉ឺនេសង់ មីនើរ៉ល ដែលទទួលបានសិទ្ធិពីរដ្ឋាភិបាលវិនិយោគអាជីវកម្មរុករករ៉ែមាសនៅអូរខ្វាវ ខេត្តមណ្ឌលគិរីបានពន្យល់ពីដំណើរការរុករកនិងចម្រាញ់រ៉ែមាសពីមួយដំណាក់កាលទៅមួយដំណាក់កាល។
ដោយបានសិក្សានិងមានបទពិសោធន៍ការងារផ្នែកធនធានរ៉ែ លោក គ្រី ឡាយហុក បានពន្យល់តាមបច្ចេកទេស មុនបានជាផលិតផលមាសសម្រេច គឺត្រូវឆ្លងកាត់នីតីវិធីតាំងពីដំណើរការរៀបចំការដ្ឋាន ការកំណត់ទីតាំងរណ្តៅរ៉ែ ការខួងបំផ្ទុះគ្រាប់រំសេវបំបែកថ្ម រហូតដល់ដំណាក់ការចម្រាញ់ដែលមាន ៧ ដំណាក់កាល និងការឈានដល់ដំណាក់កាលចុងក្រោយនៃការដកហូតចេញជាផលិតផលមាសសម្រេចបញ្ចេញនៅលើទីផ្សារ៕
