ខេត្តមណ្ឌលគិរី ៖ ពលរដ្ឋបានឲ្យដឹងថា ក្រុមមន្ត្រីដែលនាំមុខដោយមន្ត្រីពីខណ្ឌរដ្ឋបាលព្រៃឈើខេត្តមណ្ឌលគិរី កាលពីរសៀលថ្ងៃទី២២ កុម្ភៈ ឆ្នាំ ២០២៥ បានចុះមកឆែកឆេរលំនៅដ្ឋាន និងរឹបអូសយកឈើរបស់គាត់ដែលត្រៀមទុកធ្វើផ្ទះដោយពុំមានដីកាពីតុលាការឡើយ។
អ្នកស្រី ផន ចន្រ្ទា ដែលមានលំនៅដ្ឋានក្នុងភូមិ ពូញ៉ាវ ឃុំមេម៉ង់ ស្រុកកែវសីមា ខេត្តមណ្ឌលគិរី បានរៀបរាប់ប្រាប់អ្នកកាសែតទាំងខឹងសម្បារកាលពីថ្ងៃទី២៥ កុម្ភៈ ថា ដោយគាត់ជាប់ថែរក្សាជំងឺប្ដី នៅមន្ទីរពេទ្យ អ្នកនៅជាមួយគាត់បានប្រាប់ថា មន្ត្រីព្រៃឈើបានសម្រុកចូលផ្ទះរបស់គាត់ដោយគ្មានដីកា ហើយបានបញ្ជា ឲ្យអ្នកនៅជាមួយគាត់វាយកម្ទេចសោរ និងបានប្រមូលយកឈើចាស់ៗ ដែលគាត់ទុកសម្រាប់ធ្វើផ្ទះប្រមាណ ១ ម៉ែត្រគូប រួមទាំងសម្ភារៈជាងមួយចំនួនដូចជា ម៉ូទ័រកាត់ឈើចំនួន២គ្រឿង ម៉ូទ័រជ្រី២គ្រឿង ម៉ូទ័រឈូស ១គ្រឿង និងម៉ូទ័រខាត់ចំនួន១គ្រឿង ដែលវាជាទង្វើដ៏អាក្រក់បំផុត ។
តែអ្នកស្រីថា នឹងមិនប្ដឹងប្ដល់យកឈ្នះចាញ់អ្វីទេ ដោយគ្រាន់តែសុំឲ្យមន្ត្រីផ្ដល់ឈើសម្រាប់ធ្វើផ្ទះ និងសម្ភារៈជាងមកវិញប៉ុណ្ណោះ ។
ទាក់ទងបញ្ហានេះ អ្នកភូមិម្នាក់ដែលឃើញហេតុការណ៍បាននិយាយថា មន្ត្រីព្រៃឈើដែលចុះមកឆែកឆេរ និងរឹបអូបឈើ នាគ្រានោះហាក់ដូចជាធ្វើឡើងក្នុងគំនុំអ្វីម្យ៉ាង គាត់ថា នៅភូមិនេះ មានសិប្បកម្មឈើធំៗមួយចំនួនមិនត្រូវបានគេ ប៉ះពាល់ឡើយ ។ ដូចជាសិប្បកម្មរបស់ឈ្មោះ ភ័គ ,យាយម៉ាប់ , សៀរ ប្រពន្ធតាអូច ជាដើម ។
យ៉ាងណាក្ដីយោងតាមកំណត់ហេតុរបស់សមត្ថកិច្ចថា ការចុះតែឆែកឆេរផ្ទះរបស់ឈ្មោះ ញ៉ន រ៉ាន់ ខាងលើគឺធ្វើតាម បញ្ជារបស់លោក ស៊ាវ ងឺឈាន់ ព្រះរាជអាជ្ញា រងអមសាលាដំបូងខេត្តមណ្ឌលគិរី ដោយមានការចូលរួមសហការពីអាជ្ញាធរមូលដ្ឋានផងដែរ។
ហើយគេបានធ្វើការរឹបអូសមានដូចជា ម៉ូទ័រកាត់ឈើ ចំនួន ០២គ្រឿង, ម៉ូទ័រជ្រើ ចំនួន០២គ្រឿង, ម៉ូទ័រឈូសឈើ ចំនួន០១គ្រឿង និងម៉ូទ័រខាតឈើ ចំនួនន០១គ្រឿង និងឈើអារ ប្រភេទលេខ១ (សុក្រម) សរុបចំនួន៧៦ ដុំ សន្លឹក (ពុំទាន់វាស់វែង) ។ ក្នុងនោះ ឈើអារប្រភេទលេខ១(សុក្រម) ចំនួន ៤៦សន្លឹក នៅក្នុងទីតាំងរោងសិប្បកម្ម និងឈើអារប្រភេទលេខ១ (សុក្រម)ចំនួន៣០ដុំ\សន្លឹក នៅក្នុងបន្ទប់ឈើចាក់សោរក្នុងបរិវេណផ្ទះ ដោយដឹកយកមករក្សាទុក នៅបរិវេណស្នាក់ការខណ្ឌរដ្ឋបាលព្រៃឈើមណ្ឌលគិរី ដើម្បីបន្តអនុវត្តទៅតាមនីតិវិធី ៕
