ខេត្តរតនគិរី ៖ ស្រុកកូនមុំ ដោយសារតែភាពអសកម្ម  គ្មាន
ទំនោលខុសត្រូវ អង្គុយចាំតែបើកប្រាក់ខែរដ្ឋ របស់មន្ត្រីជលផល និងការបណ្ដែត បណ្ដោយ យ៉ាងអាណាធិបតេយ្យ របស់សមត្ថកិច្ចពាក់ព័ន្ធ ក្នុងស្រុកមួយចំនួន បានធ្វើឱ្យបុរសម្នាក់ ស្លាប់យ៉ាងអាណោចអាធ័ម។

តាមប្រភពព័ត៌មានដែលអង្គភាពយើងទទួលបាន បុរសម្នាក់ឈ្មោះ ខៃ រស់សាម៉ៃ (ហៅពួយ) អាយុ ៤០ ឆ្នាំជនជាតិខ្មែរ មានទីលំនៅបច្ចុប្បន្នភូមិ ស្រែពកតូច ឃុំសិរីមង្គល ស្រុកកូនមុំ ខេត្តរតនគិរី ដែលមានភរិយាឈ្មោះ បែង មានទីលំនៅបច្ចុប្បន្ន រស់នៅជាមួយប្ដីដែលបានស្លាប់បាត់បង់ជីវិតខាងលើ។

យោងតាមប្រភពដដែល បានឱ្យដឹងទៀតថា កាលពីវេលាម៉ោង ប្រហែល ៨យប់ ថ្ងៃទី ២០ ខែវិច្ឆិកា ឆ្នាំ ២០២៤ ឈ្មោះ ខៃ រស់សាម៉ៃ (ហៅពួយ) បានកាន់ឧបករណ៍ឆក់ត្រី រួចឡើងជិះទូក ធ្វើដំណើរទៅឆក់ត្រី នៅក្នុងទន្លេស្រែពក ក្នុងស្រុកកូនមុំ ខេត្តរតនគីរី ដូចសព្វមួយដង រហូតដល់ថ្ងៃទី ២១ ខែវិច្ឆិកាឆ្នាំ ២០២៤ មិនឃើញឈ្មោះខាងលើត្រឡប់មកផ្ទះវិញសោះ។

ដោយឃើញសភាពមិនស្រួល អ្នកស្រីបែង ដែលត្រូវជាភរិយា ក៏បានរាយការណ៍ជូនទៅរដ្ឋបាលប៉ុស្តិ៍ សិរីមង្គល ពីរករណីបាត់ខ្លួនរបស់ប្ដី ។

រហូតដល់ថ្ងៃទី ២២ ខែវិច្ឆិកា ឆ្នាំ ២០២៤ វេលាម៉ោង ១១និង ៣០នាទីកម្លាំងសមត្ថកិច្ចនិងបងប្អូនសាច់ញាតិជនរងគ្រោះ បានទៅប្រទះឃើញសព ឈ្មោះ ខៃ រស់សាម៉ៃ ស្លាប់អណ្ដែតទឹកហើមស្ពីង នៅត្រង់ចំណុច កោះអន្លង់ផ្តិល  យ៉ាងអាណោចអធម្ម ។

គួររំលឹកផងដែរថា ដោយសារតែភាពអសកម្ម គ្មានទំនោលខុសត្រូវ លើតួនាទី និងភារកិច្ចរបស់ខ្លួន របស់មន្ត្រីជលផលខេត្តរតនគិរី ក៏ដូចជាសមត្ថកិច្ចពាក់ព័ន្ធនៅតាមបណ្ដាស្រុក
ដែលបណ្ដែតបណ្ដោយធ្វើឲ្យមានបទល្មើស កើតឡើង ដូចជាករណី ដាក់អួន ឬក៏ដាក់ដាយ បិទអូរ តូចធំ ជាពិសេស បទល្មើសឆក់ត្រី ឆក់ក្តៅ ឆក់ត្រជាក់ បានកំពុងពេញនិយម នៅតាមបណ្ដាស្រុកមួយចំនួន ដែលមានដងទន្លេ ឆ្លងកាត់ ជាពិសេស បទល្មើសឆក់ត្រីពេញទន្លេ យ៉ាងអាណាធិបតេយ្យគ្មានច្បាប់ទម្លាប់ តាមបណ្ដោយ ទន្លេស្រែពក ចាប់ពីស្ពានស្រែពក ស្រុកកូនមុំ ឡើងរហូតទៅដល់ ស្រុកលំផាត់ ខេត្តរតនគិរី ។

ក្រោយពីការប្រមូលផល ដាក់អួន ដាក់ដាយ ឆក់ក្តៅ ឆក់ត្រជាក់ បានត្រីតូចធំ មិនថាខែប្រាំង ឬខែវស្សា រដូវបើកនេសាទ ឬក៏ រដូវបិទនេសាទ នោះទេ ត្រីតូចតាច ល្អិតល្អោចពួកគេ តែងតែយកទៅលក់ចែកចាយនៅក្នុងផ្សារបានលុង ចំណែកត្រីធំៗ ឬក៏ត្រីមានតម្លៃល្អៗពួកគេតែងតែ បញ្ជូនយក ទៅលក់នៅឯប្រទេសជិតខាង ឬក៏បញ្ជូនទៅលក់នៅឯបណ្ដាខេត្តផ្សេងៗ ជាពិសេសបញ្ជូនទៅលក់នៅឯក្រុងភ្នំពេញ។

ទោះបីជាយ៉ាងនេះក៏ដោយ ជំនាញនិងសមត្ថកិច្ចពាក់ព័ន្ធមិនដែលធ្វើការហាមឃាត់ ឬបង្ក្រាបទប់ស្កត់ អ្វី នោះឡើយ ។
បើតែយ៉ាងៗនេះ តើឱ្យពលរដ្ឋរំពឹងអ្វីទៅ………????