កងពលធំអន្តរាគមន៍លេខ៣ បើកវគ្គបំប៉នហ្វឹកហ្វឺនពង្រឹងបន្ថែមលើសមត្ថភាពយោធា!

ពិធីនេះធ្វើឡើងកាលពីថ្ងៃទី២៨ ខែតុលា ឆ្នាំ២០២៤  ក្រោមអធិបតីភាព លោក គីម រិទ្ធី អភិបាលខេត្ត. លោកឧត្តមសេនីយ៍ឯក ស្រី ឌឹក មេបញ្ជាការកងពលធំអន្តរាគមន៍លេខ៣ និងមានការចូលរួមពីថ្នាក់ដឹកនាំខេត្ត មេបញ្ជាការ មេបញ្ជាការរង បណ្ដាអង្គភាពប្រចាំទិសទី១ប្រាសាទព្រះវិហារ គ្រប់អង្គភាពពាក់ព័ន្ធ គ្រូយោធាចារ្យ កម្មសិក្សាការី(សិក្ខាកាម) នាយទាហាន នាយទាហានរង និងពលទាហានជាច្រើនរូបទៀតផងដែរ ។

លោកឧត្តមសេនីយ៍ឯក ស្រី ឌឹក បានបង្ហាញថាៈលទ្ធផលការងារហ្វឹកហ្វឺនឆ្នាំ២០២៣ កន្លងមកគឺមាន៤វគ្គ ដោយមានសិក្ខាកាមចូល រួម ៤០០នាក់ គ្រូយោធាចារ្យ៤០នាក់ រយៈពេល៣ខែ ហ្វឹកហ្វឺនលើវគ្គបំប៉នជំនាញប្រឆាំងភេរវកម្ម ១វគ្គសិក្ខាកាមចូលរួម១០០នាក់និងវគ្គហ្វឹកហ្វឺនពង្រឹងវរសេនាតូច របស់បណ្តាកងពលតូចចំណុះទាំង៣ មាន៣វគ្គ និងមានសិក្ខាកាម ៣០០នាក់ ។

លោកឧត្តមសេនីយ៍ឯកមេបញ្ជាការបានបន្តថាៈនៅចុងបញ្ចប់វគ្គ សិក្ខាកាមទាំងអស់សុទ្ធតែទទួលបានលទ្ធផលល្អ កត្តានេះបានឆ្លុះបញ្ចាំងឱ្យឃើញពីការយកចិត្តទុកដាក់អស់ពីកម្លាំងកាយចិត្ត ពីសំណាក់នាយទាហាន តាមបណ្តាជំនាញពាក់ព័ន្ធ គណៈគ្រប់គ្រងវគ្គគ្រូយោធាចារ្យ ក៏ដូចជាការខិតខំប្រឹងប្រែងដោយផ្ទាល់ ពីសំណាក់សិក្ខាកាមតាមវគ្គនីមួយៗផងដែរ ។

ដោយឡែក វគ្គហ្វឹកហ្វឺនឆ្នាំ២០២៤នេះមានចំនួន៥វគ្គ មានសិក្ខាកាមចូលរួម៣៤០នាក់ គ្រូយោធាចារ្យ១៧នាក់ ហ្វឹកហ្វឺនរយៈពេល៣ខែ មាន២វគ្គ គឺវគ្គហ្វឹកហ្វឺនបំប៉នជំនាញ ២វគ្គគឺវគ្គហ្វឹកហ្វឺនបំប៉នជំនាញរថពាសដែក វគ្គហ្វឹកហ្វឺនបំប៉នជំនាញអាវុធគាំទ្រថ្មើរជើងត្បាល់ដេកា និងវគ្គហ្វឹកហ្វឺនពង្រឹងវរសេនាតូច តាមបណ្តាកងពលតូចចំណុះទាំង៣ គឺកងពលតូចអន្តរាគមន៍លេខ៧ កងពលតូចអន្តរាគមន៍លេខ៨ និងកងពលតូចអន្តរាគមន៍លេខ៩ ចំនួន៣វគ្គថែមទៀតផង ។

អភិបាល នៃគណៈអភិបាលខេត្តព្រះវិហារ លោក គីម រិទ្ធី បានថ្លែងកោតសរសើរ និងវាយតម្លៃខ្ពស់ចំពោះការខិតខំប្រឹងប្រែងរបស់ថ្នាក់ដឹកនាំ ព្រមទាំងកងកម្លាំងដែលជានាយទាហាន និងពលទាហានទាំងអស់ ដែលនេះសបញ្ជាក់ឱ្យឃើញអំពីការខិតខំប្រឹងប្រែង និងវឌ្ឍនភាពការងារដែលសម្រេចបានស្នាដៃ និងសមិទ្ធផលធំៗជាច្រើន លើការងារអភិវឌ្ឍវិស័យការពារជាតិការងារសន្តិសុខយោធា ការងារអប់រំ បណ្តុះបណ្តាលហ្វឹកហ្វឺន បំប៉នកងកម្លាំង ទាំងចំណេះដឹង ជំនាញបច្ចេកទេស និងស្មារតី ឆន្ទៈ មនសិការស្នេហាជាតិ ដើម្បីធានាចីរភាព នៃខឿនការពារអធិបតេយ្យជាតិ បូរណភាពទឹកដី និងការងារថែរក្សាសន្តិសុខ សុវត្ថិភាព ជូនប្រជាពលរដ្ឋនៅមូលដ្ឋាន ។

លោកអភិបាលខេត្តព្រះវិហារ បានផ្តាំផ្ញើដល់សិក្ខាកាមទាំងអស់ត្រូវយកចំណេះដឹង និងជំនាញដែលទទួលបាននេះ ទៅប្រើប្រាស់ឱ្យចំគោលដៅ និងមានប្រសិទ្ធភាពខ្ពស់ក្នុងកិច្ចការការពារអធិបតេយ្យភាពបូរណភាពទឹកដី ការពារជាតិ សាសានា ព្រះមហាក្សត្រ ការពាររដ្ឋធម្មនុញ្ញ ការពាររាជរដ្ឋាភិបាលស្របច្បាប់ ការពារសុខសន្តិភាព និងសេចក្តីសុខសាន្តជូនប្រជាជនមិនឱ្យជនណាមកបំផ្លិចបំផ្លាញបានជាដាច់ខាត ។

លោក គីម រិទ្ធី បានក្រើនរំលឹក ដល់ថ្នាក់ដឹកនាំយោធិនឱ្យបន្តគិតគូររៀបចំផែនការហ្វឹកហ្វឺនលើជំនាញផ្សេងៗទៀត ដើម្បីបន្តពង្រឹងសមត្ថភាពកងទ័ព ទាំងទ្រឹស្តី និងការអនុវត្តជាក់ស្តែង សំដៅចូលរួមចំណែក ក្នុងការអនុវត្តផែនការកែទម្រង់កងកម្លាំង ខឿនការពារជាតិ និងគោលនយោបាយរបស់ រាជរដ្ឋាភិបាល លើវិស័យការពារជាតិ ឱ្យទទួលបានជោគជ័យ ៕