មណ្ឌលគិរី៖ ឯកឧត្តម ម៉ែន ង៉ុយ ប្រធានក្រុមប្រឹក្សាខេត្តមណ្ឌលគិរី និងលោកស្រី វិន ស៊ីធួន អភិបាលរងខេត្ត បានអញ្ជើញជាអធិបតីភាព ក្នុងពិធីបិទមហោស្រពសិល្បៈ(ចម្រៀងសម័យចាប់ពីទសវត្សរ៍ទី៦០ ដល់បច្ចុប្បន្ន និងម្ហូបអាហារជនជាតិដើមភាគតិចឆ្នាំ២០២៤ ដោយមានការចូលរួមពីកងកម្លាំងប្រដាប់អាវុធទាំងបី ថ្នាក់ដឹកនាំមន្ទីរអង្គភាពជុំវិញខេត្ត សហភាពសហព័ន្ធយុវជនកម្ពុជាខេត្ត យុវជនកាយរឹទ្ធិជាតិកម្ពុជាខេត្ត តំណាងអង្គការដៃគូ វិស័យឯកជន លោកគ្រូ អ្នកគ្រូ បេក្ខជន បេក្ខនារី និងសិស្សានុសិស្សជាច្រើននាក់ ដែលប្រព្រឹត្តិទៅនៅមន្ទីរវប្បធម៌ និងវិចិត្រសិល្បៈខេត្តមណ្ឌលគិរី នារសៀលថ្ងៃទី១៣ ខែកញ្ញា ឆ្នាំ២០២៤។
លោកស្រី វិន ស៉ីធួន អភិបាលរងខេត្ត បានសម្ដែងនូវការអបអរសាទរ កោតសរសើរ និងមានតម្លៃខ្ពស់ចំពោះថ្នាក់ដឹកនាំមន្ត្រីរាជការនៃមន្ទីរវប្បធម៌ និងវិចិត្រសិល្បៈខេត្ត ដែលបានខិតខំប្រឹងប្រែងយកអស់កម្លាំងកាយចិត្ត ប្រាជ្ញា និងស្មារតី ក្នុងការចូលរួមអនុវត្តការងារទទួលបានជោគជ័យ និងសូមឲ្យបន្តយកចិត្តទុកដាក់អនុវត្តសកម្មភាពការងារឲ្យបានកាន់តែល្អប្រសើរឡើងថែមទៀត ដើម្បីឈានទៅសម្រេចឲ្យបាននូវគោលនយោបាយជាតិស្ដីពីវប្បធម៌អភិរក្ស និងអភិវឌ្ឍន៍វប្បធម៌ជាតិ ដោយអនុវត្តស្របតាមគោលនយោបាយដឹកនាំរបស់រាជរដ្ឋាភិបាលកម្ពុជា ដែលដឹកនាំដោយសម្ដេចមហាបបរធិបតីហ៊ុនម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។ លោកស្រី បានផ្តល់អនុសាសន៍ ដល់បេក្ខជន បេក្ខនារី ដែលទទួលបានជ័យលាភី គឺត្រូវបន្តហ្វឹកហាត់ថែមទៀត ដើម្បីមានឱកាសទៅចូលរួមព្រឹត្តិការណ៍មហាស្រពនានានៅថ្នាក់ជាតិ និងថ្នាក់ខេត្តជាបន្តបន្ទាប់ទៀត ដើម្បីដណ្ដើមជ័យលាភីជូនខេត្តនិងកិត្តិយសផ្ទាល់ខ្លួន។ ចំពោះបេក្ខជន បេក្ខនារី ដែលពុំបានទទួលជ័យលាភី សូមកុំអាក់អោនស្រពោនចិត្ត សូមបន្តខិតខំបន្ថែមទៀត សម្រាប់ឱកាសក្រោយៗ។ មន្ទីរវប្បធម៌ និងវិចិត្រសិល្បៈខេត្ត ត្រូវចូលរួមបង្ករលក្ខណៈដល់បេក្ខជន បេក្ខនារីដែលមានចំណាប់អារម្មណ៍ លើវិស័យវប្បធម៌ និងវិចិត្រសិល្បៈ ឲ្យកាន់តែទូលំទូលាយ ដើម្បីឲ្យមានឱ្យមានការចូលរួមប្រកួតប្រជែង កាន់តែលក្ខណៈល្អប្រសើរពីមួយឆ្នាំទៅមួយឆ្នាំ ព្រោះមន្ទីរវប្បធម៌ ជាយាន ដើម្បីឲ្យយុវជនមានឱកាសបញ្ចេញនូវសមត្ថភាពរបស់ខ្លួនលើវិស័យសិល្បៈនិងវប្បធម៌នេះ។
លោក សុខ ទីឃាវុឌ្ឍ ប្រធានមន្ទីរវប្បធម៌ និងវិចិត្រសិល្បៈខេត្តមណ្ឌលគិរីស្តីទី បានឲ្យដឹងថា ដោយមានការអនុញ្ញាតពីរដ្ឋបាលខេត្ត មន្ទីរក៏បានធ្វើការផ្សព្វផ្សាយជ្រើសរើសបេក្ខជន បេក្ខនារីនដើម្បីចូលមកប្រកួតវិញ្ញាសារចម្រៀងសម័យចាប់ពីទសវត្សរ៍ទី៦០ មកដល់បច្ចុប្បន្ន និងជ្រើសរើស អ្នកដែលចេះធ្វើម្ហូបជនជាតិមកបង្ហាញពីមុខម្ហូបចំនួន ៤មុខ ក្នុងចំណោម ២១មុខ ដែលមន្ទីរវប្បធម៌ និងវិចិត្រសិល្បៈ បានចងក្រងកន្លងមក។ លោក បញ្ជាក់ថា ការផ្សព្វផ្សាយជ្រើសរើសបេក្ខជន បេក្ខនារី បានធ្វើឡើងចាប់ពីថ្ងៃទី៣០ ខែសីហា ដល់ថ្ងៃទី០៦ ខែកញ្ញា ឆ្នាំ២០២៤ ជាលទ្ធផល ទទួលបានបេក្ខជន បេក្ខនារី មកដាក់ពាក្យចំនួន ១៦នាក់ និងស្រី ០៦នាក់ ដែលមកពីបណ្តាក្រុង/ស្រុក ក្នុងខេត្តមណ្ឌលគិរី។
នាឱកាសនោះ ថ្នាក់ដឹកនាំខេត្ត បានផ្តល់ប័ណ្ណជ័យលាភី ដល់បេក្ខជន បេក្ខនារី ដែលជាប់ចំណាប់ថ្នាក់លេខ១ ដល់លេខ៥ និងអ្នកធ្វើម្ហូបអាហារជនជាតិដើមភាគតិច ដើម្បីជាការលើកទឹកចិត្តផងដែរ៕
